ភ្នំពេញ៖ រដ្ឋមន្ត្រីក្រសួងព័ត៌មានបានអំពាវនាវឱ្យរួមគ្នាផ្សព្វផ្សាយពីវិធីការពារ បង្ការពិការភាពឱ្យបានទូលំទូលាយដើម្បីកាត់បន្ថយភាពរងគ្រោះដែលអាចបង្កឱ្យកើតនូវភាពពិការបាន។

ថ្លែងក្នុងពិធីពិធីបើកជាផ្លូវការកម្មវិធីប្រឡងសំនៀងជនពិការកម្ពុជា ពានរង្វាន់ សម្តេចអគ្គមហាសេនាបតីតេជោ ហ៊ុន សែន លោករដ្ឋមន្ត្រី ខៀវ កញារីទ្ធ បានថ្លែងថា ជនមានពិការភាពមិនមែនជាបន្ទុកសង្គមនោះទេ ដោយថាពួកគាត់ក៏មានលទ្ធភាពក្នុងការរស់នៅ ចិញ្ចឹមជិវិតដោយខ្លួនឯងនិងមានសមត្ថភាពដូចមនុស្សទូទៅដែរ អ្វីដែលចាំបាច់គឺការគាំទ្រដល់ពួកគាត់ឱ្យមានភាពកក់ក្ដៅនិងចូលរួមក្នុងសកម្មភាពសង្គម។

ទោះជាយ៉ាងលោកបានជំរុញឱ្យមានការផ្សព្វផ្សាយនូវវិធីនានាដែលអាចបញ្ជៀសនូវភាពពិការបានតាមរយៈការជំរុញ តាមដានសុខភាពក្នុងពេលមានគ៌គ ការតាមដាននិងវិនិច្ឆ័យរោគដែលនាំឱ្យមានពិការភាព ការបង្កើនការយល់ដឹងពីថ្នាំដែលអាចនាំឱ្យមានពិការភាព អាហារដែលទ្រទ្រង់រាងកាយ ការអប់រំអំពីមូលហេតុដែលនាំឱ្យមានពិការភាពដូចជាគ្រាប់មីននិងគ្រោះថ្នាក់ចរាចរណ៍ជាដើម។

បច្ចុប្បន្នជនមានពិការភាពនៅកម្ពុជាមានចំនួនជាង ៥០ម៉ឺននាក់ ស្មើនឹង ៤,៩ភាគរយនៃប្រជាជនសរុប ១៦លាននាក់ ខណៈដែលស្ថានភាពនៃជនមានពិការភាពត្រូវបានយកចិត្តទុកដាក់ជាបន្តបន្ទាប់ពីរាជរដ្ឋាភិបាល ដើម្បីឱ្យធ្វើឱ្យជនមានពិការភាពទាំងអស់មានលទ្ធភាពចូលរួមក្នុងការអភិវឌ្ឍន៍ប្រទេសបានដូចពលរដ្ឋទូទៅ៕ 

^{PHOTO: EAC NEWS}